საქართველოს განათლებისა და მეცნიერების სამინისტროს ხელშეწყობით ათასწლეულის გამოწვევის ფონდი, გუდავაძე-პატარკაციშვილის ფონდთან ერთად, პროფესიული განათლების პოპულარიზაციის ხელშეწყობისთვის საინფორმაციო კამპანიას – „აირჩიე შენი მომავალი პროფესია“ – ახორციელებს.

კამპანიის ფარგლებში ღია კარის დღე ამჯერად კოლეჯ „ფაზისში“ ონლაინ ფორმატში გაიმართა, სადაც შეხვედრის მონაწილეები საგანმანათლებლო პროგრამებსა და კურსდამთავრებულთა შემდგომი დასაქმების ხელშეწყობის მიმართულებით კოლეჯის სამომავლო გეგმებს გაეცნენ. ღია კარის ღონისძიებაში მონაწილეობა განათლებისა და მეცნიერების მინისტრის მოადგილე თამარ ქიტიაშვილმა, ათასწლეულის გამოწვევის ფონდის აღმასრულებელმა დირექტორმა მაგდა მაღრაძემ, კოლეჯ „ფაზისის“ წარმომადგენლებმა, სტუდენტებმა და სხვა მოწვეულმა სტუმრებმა დისტანციურად მიიღეს.

კოლეჯი „ფაზისი“ პროფესიულ საგანმანათლებლო საქმიანობას ორ ლოკაციაზე – ფოთსა და ხობის მუნიციპალიტეტის სოფელ ნოჯიხევში – ახორციელებს. საგანმანათლებლო დაწესებულება სტუდენტებს სთავაზობს პროგრამებს, როგორც ბიზნესის, ადმინისტრირების, სამართლისა და ინფორმაციისა და კომუნიკაციის ტექნოლოგიების, ასევე, ინჟინერიის, წარმოების, მშენებლობის, ხელოვნების, ჰუმანიტარული მეცნიერებების, განათლების, სოფლის მეურნეობის, მეტყევეობის, მეთევზეობისა და ვეტერინარიის მიმართულებით.